In die Grondslagfase leer kinders om sinne te skryf. Dis nogals ‘n moeilike ding om te doen as jy nie weet waar om te begin nie! Hier is ‘n paar idees oor hoe om jou kind te help:
-
Gesels met jou kind oor sinne terwyl julle lees. Wys waar ‘n sin begin en eindig.
-
Laat jou kind sinne maak en sê sonder om dit neer te skryf.
-
Vra vrae oor die sin, bv: Hoe lyk die seun? Hoe hoog spring hy? Hierdie tipe vrae sal jou kind leer om meer detail in die sinne te skryf.
-
As jou kind ‘n woord kry om ‘n sin mee te maak, laat hy eers die sin vir jou sê. Vervang dan die woord en herhaal jy die sin. Bv: “Die hond sit.” Nou maak jy die sin: “Die duif sit.” Jou kind sal besef dat die sin eintlik niks sê nie. Moedig jou kind aan om sinne te maak wat iets oor die woord sê, bv: “Die hond blaf die heeldag vir die kat.” As jy die laaste sin se “hond” met “duif” vervang, kan jy agterkom dat dit ‘n goeie sin is!
-
Gee vir jou kind geskommelde woorde (wat ‘n sin maak) en laat hy dit reg skommel.
-
Help jou kind om die sin neer te skryf. Sê die eerste woord, laat hy dit dan skryf. Sê die volgende woord, laat hy dit skryf, ens.
-
Maak oulike sinne en laat jou kind dit afskryf.
-
Vra jou kind uit oor wat die maatjies se sinne was.
-
Prys jou kind se pogings en moenie dit afkraak nie.
